ХЕРОЈСКА ПОСТАПКА НА ПЕЛИСТЕР: Ренџери спасија мало срнче од напад на куче и го вратија кај мајка му

Вработените во Јавната установа Национален парк Пелистер изведоа успешна акција за спасување на младенче од срна, кое било нападнато од куче скитник на планината.

Како што информираат од Националниот парк, благодарение на брзата и присебна реакција на Зоран Пројчевски, раководител на помошно-техничкото одделение, и ренџерот Неџип Сефедини, животот на малото срнче бил спасен во последен момент.

Она што ја прави оваа приказна уште поемотивна е начинот на кој ренџерите успеале целосно да ја заокружат спасувачката мисија. По успешното одвојување на срнчето од кучето, тие со помош на вешто имитирање звуци успеале да ја повикаат неговата мајка и повторно да ги спојат.

„Вработените Зоран Пројчевски и ренџерот Неџип Сефедини спасија мала срна која беше нападната од куче бездомник. Подоцна со помош на имитирање звуци малата срна беше повторно споена со својата мајка“, соопштија од ЈУ Национален парк Пелистер.

Споделија и видеоснимка од преслаткото срнче, која веднаш ги предизвика симпатиите и позитивните коментари на социјалните мрежи, каде граѓаните упатуваат огромни пофалби за хуманоста и професионалноста на пелистерските ренџери.