Средношколци од Битола и Прилеп ќе спремаат кампања за заштита на шумите

Националниот парк Пелистер беше домаќин на средношколци од Битола и Прилеп, меѓу кои и средношколци од СОУ “Таки Даскало“ Битола, кои имаа можност организирано преку иницијативата “Заштитници на шумите“ да го посетат Инфо центарот на Пелистер и да се запознаат со природните богатства на националниот парк.

Целта е поттикнување на јавната свест за заштита на шумите и инспирирање на младите да се најдат во улога на креатори на кампања со која ќе ја истакнат важноста на моликата на Пелистер и ќе ја зајакнат граѓанската свест дека шумите, како извор на кислород и штит од ерозија, се национално богатство чија заштита е одговорност на секој поединец.

Овој проект го спроведува граѓанската организација Граѓански Патеки (Civic Tracks Association), a е поддржан од Фондот за зајакнување на младите (Youth Empowerment Fund) во рамките на Глобалната младинска мобилизација (Global Youth Mobilization - GYM), со финансиска поддршка од Европската Унија (EU).