Голем успех за македонското радиоаматерство: Професорот Дејан Трајковски ја освои престижната плакета „10 Band DXCC“

Македонскиот професор Дејан Трајковски оствари уште еден значаен успех освојувајќи ја престижната плакета 10 Band DXCC, која во радиоаматерската заедница се смета за еден од највисоките докази за оперативна вештина, конструкторство и упорност.

Признанието се доделува за официјално потврдени двострани радиоаматерски врски со најмалку 100 различни земји на секој од десетте посебни радиоаматерски опсези: 160 m, 80 m, 40 m, 30 m, 20 m, 17 m, 15 m, 12 m, 10 m и 6 m.

За разлика од основната DXCC диплома, која може да се освои со работа на еден омилен опсег или со комбинација на повеќе, признанието 10 Band DXCC бара совладување на десет потполно различни физички средини за просторање на радиобрановите — од ноќните услови и шум на најниската фреквенција од 160 метри („the top band“), па сè до непредвидливите отворања на 6 метри („the magic band“).

„Секој опсег бара сопствена филозофија на антени, конструкторство, операторски вештини и борба за секоја нова земја“, истакнува Трајковски.

Од Битола до Асамати: Како беше совладан последниот предизвик

За повеќето радиоаматери најголем предизвик претставува собирањето на 100 земји на 160 метри, но кај Трајковски последниот и најтежок чекор бил опсегот од 6 метри.

Додека работел од Битола, поради географската положба во котлината и заклонетоста со Баба Планина, тој успеал да стигне до околу 80 земји. Пресвртот настанал со префрлање на локацијата за работа во Асамати, од каде што се отворила радио-патеката кон Африка и Јужна Америка, со што брзо била премината границата од 100 потврдени земји и на овој опсег.

Највисок официјален рејтинг во Македонија

Трајковски моментално има 2.277 официјално потврдени и признаени DXCC земји збирно на сите 10 опсези. Според официјалната евиденција на Американската радиорелејна лига (ARRL), тоа го прави сопственик на моментално највисокиот официјално признат рејтинг на DXCC Challenge листата во Македонија.

Неговите следни амбиции вклучуваат:

DXCC Honor Roll: Трајковски моментално има 330 активни земји (вкупно 337 со 7 избришани). Нему му недостасува уште само една земја за да влезе во елитното светско друштво на радиоаматери кои имаат потврдено врски со речиси сите активни DXCC земји во светот. Големи надежи полага на најавената експедиција на островот Петар Први (Peter I Island) во февруари 2027 година.

DXCC Satellites: Покрај класичните опсези, тој активно работи и преку сателити, со цел наскоро да ја донесе првата диплома DXCC Satellites во Македонија.