Училиштата стануваат арени за пресметки: Расте бруталноста меѓу младите, властите воведуваат солени казни за родителите

Фотографија: Министерство за образование

Расте бруталноста во случаите на врсничко насилство: Институциите ги зајакнуваат превентивните и казнените мерки

Во последните три учебни години во Македонија просечно се пријавуваат по околу 50 случаи на врсничко насилство годишно. Иако самиот број на инциденти не бележи пораст, загрижувачки е тоа што драстично се зголемува бруталноста и агресијата кај децата и младите.

Ова го истакна министерката за образование и наука, проф. д-р Весна Јаневска, за време на панел-дискусијата „Меѓуврсничко насилство и вандализам“, која по повод Меѓународниот ден на младите – 12 Август, се одржа во Охрид под покровителство на претседателката Гордана Сиљановска-Давкова.

За спречување на овој деструктивен тренд, институциите преземаат низа превентивни и системски чекори. Поголема контрола и стручна поддршка во училиштата, односно се зајакнуваат стручните служби со нов кадар, а повторно се вратени и дежурствата на наставниците за време на одморите во ходниците и училишните дворови.

Се работи и на Прирачници за сајбер-булинг и насилство. Во соработка со „Телеком“, УНИЦЕФ и „Макпетрол“ се изработени прирачници за препознавање и спречување интернет-насилство и врснички конфликти, а со Коалицијата „СЕГА“ се подготвуваат национални стандарди за безбедни училишта.

Многу е важен и процесот на препознавање на семејното насилство. Анализите упатуваат дека коренот на детската агресија често лежи во семејството. Затоа, МОН во соработка со МВР, Министерството за социјална политика и Комората на психолози спроведува обуки за наставниците и психолозите со цел рано препознавање на семејно насилство и занемарување кај децата.

Паричните казни за родителите се важен момент. Во собраниска процедура се законски измени со кои се предвидуваат парични казни за родителите и старателите чии деца вршат врсничко насилство, како и за оние кои одбиваат соработка со училишните служби.

Сериозноста на состојбата ја потврдуваат и последните инциденти на терен, како неодамнешниот случај во Битола каде 16-годишно момче беше групно нападнато во училишен двор, како и физичките пресметки меѓу млади во Прилеп.

„Укажувајте, спречувајте обиди за булинг, пријавувајте насилство, бидете емпатични, заштитете ги послабите и помогнете им на оние на кои им е потребна помош“, им порача Јаневска на младите, апелирајќи на враќање на вредностите како толеранцијата, емпатијата и солидарноста.