ХУМАНОСТ НА ДЕЛО: Општина Новаци испраќа 5000 шишиња вода како помош за Гостивар

Во знак на солидарност и поддршка за граѓаните кои се соочуваат со недостиг на питка вода, Општина Новаци денеска организираше итна хуманитарна акција, испраќајки донација од 5.000 шишиња флаширана вода за пиење наменети за жителите на Гостивар.

Од локалната самоуправа на Општина Новаци истакнуваат дека во вакви предизвикувачки моменти, меѓуопштинската солидарност и брзата реакција се клучни за надминување на проблемите со кои се соочуваат нашите сограѓани низ државата.

„Хуманоста не познава граници. Кога еден наш град се соочува со криза, наша должност е да помогнеме колку што можеме. Се надеваме дека оваа донација барем делумно ќе ги олесни проблемите со снабдувањето со вода во Гостивар“, изјавија од Општина Новаци.

Водата е веќе натоварена и се очекува во текот на денот да пристигне во Гостивар, каде ќе биде дистрибуирана до оние на кои им е најпотребна.