Забележа Дива депонија во Пелагонија? Реагирај и алармирај - Пријави на платформата Ecoalarm.mk

Дивите депонии и нелегално исфрлениот отпад се сериозна закана за околината, здравјето и квалитетот на животот во Пелагонискиот Регион. Со цел локалните заедници активно да се вклучат во борбата за чиста животна средина, Здружението на граѓани „Граѓански патеки“ – Битола го разви и го реализира проектот и онлајн платформата Ecoalarm.mk.

Медиумски партнер и поддржувач на оваа иницијатива е Evo.mk, кој преку своите новинарски стории ќе им даде дополнителна гласност на пријавените случаи.

Стани „Еко Ренџер“ и алармирај за дива депонија!

Секогаш кога ќе забележиш дива депонија или нелегален отпад во твоето опкружување можеш да реагираш.

Процесот за мапирање и пријавување е брз и достапен за сите граѓани:

Фотографирај и лоцирај: Направи три фотографии од дивата депонија и забележи ја точната локација (општина, село или локален пат).

Испрати ги податоците: Испрати ги фотографиите и локацијата на официјалната е-пошта: graganskipateki@gmail.com.

Ако сакаш да одиш и чекор понатаму креирај профил за „Еко Ренџер“: Доколку сакаш директно да внесуваш нелегален отпад на интерактивната Аларм Мапа, испрати ги твоите основни податоци (име, презиме и телефонски број) на истата е-пошта за да ти биде креиран кориснички профил.

Мапирање и поттикнување на повисока еколошка свест

Сите пријавени ѓубришта се внесуваат на дигиталната мапа. Главната цел е да се поттикне јавната свест за опасностите од расфрланиот отпад во урбаните и руралните средини и да се изврши притисок врз надлежните за нивно чистење.

Проектот „Еко Аларм“ е реализиран од Здружението на граѓани „Граѓански патеки“ – Битола, во соработка со тим од млади волонтери и активисти од Битола, Прилеп, Крушево, Новаци и Могила. Веб-платформата е изработена со финансиска поддршка од Youth Empowerment Fund и Европската Унија.

Вклучи се и ти!

Сакаш ли да придонесеш за почиста животна средина? Чистата средина е наша заедничка одговорност! Посети ја платформата Ecoalarm.mk, мапирај дива депонија и биди дел од промената во Пелагонија.