ЗЛАТО ЗА МАКЕДОНСКИОТ МЕД ВО СЛОВЕНИЈА: Filipo Macedonia со меѓународно признание од саемот AGRA 2026

Македонското пчеларство забележа уште еден значаен меѓународен успех. Медот од фацелија, произведен од битолското семејно пчеларство „Filipo Macedonia“, се закити со златен медал во категоријата ливадски мед на престижниот меѓународен земјоделски и прехранбен саем „AGRA 2026“, кој традиционално се одржува во Горња Радгона, Словенија.

Во конкуренција на бројни изложувачи и производители од Словенија, Италија и низа други европски земји, стручното жири го препозна супериорниот квалитет, природната чистота и специфичната арома на македонскиот мед од фацелија.

„Ова не е само медал. Зад секое признание стојат многу труд, љубов, посветеност и почит кон пчелите и природата. За мене, медот никогаш не бил само производ — тој е љубов, уметност и дел од мојот живот“, истакнува Филип Крстевски, изразувајќи благодарност до сите верни купувачи и поддржувачи кои се дел од оваа успешна домашна приказна.

Успехот на саемот „AGRA 2026“ претставува уште една потврда за огромниот потенцијал на македонското пчеларство и високите стандарди што ги поставуваат домашните производители на европската и светската сцена.

По освојувањето на златото во Словенија, од „Filipo Macedonia“ веќе ги најавуваат следните амбициозни чекори — учество и презентација на квалитетот на македонскиот мед на претстојниот светски натпревар „Paris International Honey Awards 2027“ во Франција.