Генерацијата 2010 на ФК Пелистер одигра силен контролен меч против Бнеи Јехуда

Младинската школа на ФК Пелистер ги продолжува интензивните подготовки за претстојната сезона, а генерацијата 2010 одигра уште еден екстра квалитетен меѓународен контролен натпревар на терените во Птолемаида, Грција.

Противник на младите битолчани беше соодветната екипа на израелскиот клуб Бнеи Јехуда. Во совршени услови за игра, двете екипи прикажаа фудбал со висок интензитет, динамика и квалитетни дуели.

Првото полувреме помина во целосно израмнета и рамноправна борба на теренот, каде мрежите мируваа и на пауза се замина со почетните 0:0. Во второто полувреме, „зелено-белите бисери“ влегоа значајно поангажирано и со два одлични погодоци зазедоа убедливо водство од 0:2.

Во продолжението од мечот, стручниот штаб на Пелистер им даде можност за докажување на сите фудбалери од тимот. Израелскиот состав ја искористи ротацијата, презеде иницијатива и успеа да направи целосен пресврт за конечни 3:2. Од таборот на младинската школа на ФК Пелистер истакнуваат дека на овие подготвителни мечеви крајниот резултат е во втор план. Главниот фокус е ставен врз стекнувањето искуство, тестирањето на сите фудбалски сегменти и градењето форма преку силни меѓународни проверки, какви што нудат подготовките во Птолемаида.