Лука Савичевиќ е ново засилување за КК Пелистер - се формира тимот за новата сезона

Кошаркарскиот клуб Пелистер продолжува со формирањето на тимот за новата сезона и го потврди ангажманот на 24-годишниот македонски кошаркар Лука Савичевиќ.

Савичевиќ пристигнува во Битола од екипата на Феникс 2010, а во својата кариера има богата интернационална и домашна биографија. Потекнува од школата на МЗТ Скопје, а има стекнато искуство во Шпанската кошаркарска академија (СБА), како и во американската колеџ-лига (НЦАА), каде ги бранеше боите на универзитетите Источен Мичиген и Лафајет. Тој исто така беше редовен член и еден од носителите на играта во младинските репрезентативни селекции на Македонија.

Со овој трансфер, раководството на КК Пелистер го потврдува својот фокус кон градење силен домашен костур на екипата.

— Ни претставува особено задоволство што уште еден млад македонски кошаркар го прифати предизвикот да биде дел од нашиот проект. Кошаркар со интернационално искуство и настапи за младите категории на нашите репрезентации ќе го облече дресот на Пелистер — соопштуваат од битолскиот клуб.

Официјалното претставување на Савичевиќ пред медиумите и навивачите ќе се реализира на почетокот од подготовките на клубот за претстојната сезона.