Могила доби нов фудбалски терен со вештачка трева изграден во рамки на глобалниот проект „FIFA Arena“

Деновиве официјално е пуштен во употреба новиот фудбалски терен со вештачка трева во општина Могила, изграден во рамки на глобалниот проект „FIFA Arena“.

На отворањето присуствуваше и генералниот секретар на Фудбалската федерација на Македонија, Леонид Јандреоски, како и легендите на македонскиот фудбал Николче Новески и Ѓорги Христов.

Упатувам искрена благодарност до ФИФА, Фудбалската федерација на Македонија, претседателот Масар Омерагиќ и генералниот секретар Леонид Јандреоски за поддршката и соработката, како и за тоа што ја препознаа Могила како дел од оваа значајна иницијатива. Овој терен не е само нов спортски објект. Тој е место каде што нашите деца ќе спортуваат, ќе се дружат, ќе го градат тимскиот дух и ќе ги развиваат своите таленти. Особено сум горд што Могила е една од само двете општини во Македонија во кои е изграден ваков современ фудбалски терен. Продолжуваме да го развиваме спортот и да создаваме подобри услови за нашите најмлади. Нека токму од овој терен започнат многу нови спортски приказни, а можеби и патот на некоја идна фудбалска ѕвезда!-порача градоначалникот на општина Могила, Драганчо Саботковски.