ФК Пелистер го отвори првиот официјален „Фан Шоп“ по 81 година постоење

Фудбалскиот клуб Пелистер вчера испиша нова, златна страница во својата богата историја. За првпат од своето основање пред повеќе од осум децении, битолската гордост доби свој официјален Фан Шоп – место каде што љубовта кон „зелено-белите“ бои добива свој дом.

На свеченото отворање, голем број навивачи, граѓани на Битола и искрени поддржувачи на клубот се собраа да го одбележат овој историски момент. Атмосферата беше исполнета со емоции, гордост и препознатливиот битолски навивачки дух.

„Ова е само почеток на една нова приказна“, велат од раководството на клубот кои не го криеја задоволството од огромниот одзив и јавно упатија огромна благодарност до сите кои беа дел од овој голем ден.

„За првпат во 81 година постоење, ФК Пелистер го отвори својот официјален Фан Шоп. Благодарност до секој што беше дел од овој посебен ден – на сите што нè посетивте, купивте, се фотографиравте и ја споделивте оваа радост со нас. Ова е само почеток на една нова приказна која ќе ја градиме заедно“, порачаа од клубот.

Новата „зелено-бела“ база во градот

Фан шопот нуди широк асортиман на официјални клупски материјали, дресови и реквизити кои навивачите со години со нетрпение ги очекуваа. Настанот помина во знакот на дружење, фотографирање со клупските обележја и купување на првите историски парчиња со логото на Пелистер.