Во Битола се одржа Првиот меморијален кошаркарски турнир „Зоран Петковски – Петкото“

Во спортската сала „Боро Чурлевски“ во Битола се одржа Првиот меморијален кошаркарски турнир посветен на битолската кошаркарска легенда, поранешен советник и истакнат спортски работник, Зоран Петковски – Петкото.

Организатор на овој дводневен настан е новоформираниот кошаркарски клуб кој го носи неговото име, а на отворањето присуствуваа членови на семејството Петковски, претставници на локалната власт, спортски работници и граѓани.

На настанот се обрати градоначалникот на Општина Битола, Тони Коњановски, кој истакна дека Петковски оставил неизбришлива трага во спортскиот и општествениот живот на градот.

„Со голема тага се присетуваме на нашиот пријател, другар, поранешен советник и спортски работник. Загубата за неговото семејство, но и за сите нас е огромна. За него спортот беше место кое зближува, рекреира, бодри и инспирира. Неговите зборови дека Битола ќе создаде услови за екипните, индивидуалните, училишните и рекреативните спортови за нас остануваат аманет кој продолжуваме да го реализираме“, истакна Коњановски.

Зоран Петковски ја започна својата кариера во КК Пелистер, беше младински репрезентативец на Македонија во генерацијата предводена од Митко Луковски, а во својата богата кариера настапуваше и за екипите на Куманово, Вардар, МЗТ Скопје и Соколи, пред повторно да се врати во матичниот Пелистер. Како советник во Советот на Општина Битола, тој несебично се залагаше за развој на спортската инфраструктура и поддршка на младите спортисти.

Турнирот, кој планира да прерасне во традиционален, е уште еден доказ дека Битола ги помни своите спортски великани кои преку сопствениот пример оставиле траен белег во заедницата.