ОБЕЗБЕДЕН ПЛАСМАН ЗА СВЕТСКО ПРВЕНСТВО: Злато, сребро и две бронзи за К.К. „Заншин до“ – Битола од Купот на Македонија

Карате клубот „Заншин до“ од Битола оствари забележителен успех на Државниот Куп на Македонија за кадети, јуниори и У21, кој се одржа на 5 и 6 септември во салата на ООУ „Кочо Рацин“ во Петровец, Скопје.

Битолскиот клуб настапи со седум натпреварувачи во седум категории, освојувајќи вкупно четири медали — едно злато, едно сребро и две бронзи — како и четири петти места.

Освоени медали и постигнати резултати:

Златен медал: Ката тим мажи (кадети-јуниори) во состав: Александар Божиновски, Михаил Марковски и Лазар Китани.

Сребрен медал: Ката тим жени во состав: Надалина Талевска, Каја Темелковска и Илина Шобевска.

Бронзени медали: Михаил Марковски и Александар Божиновски во поединечна конкуренција (ката, јуниори мажи).

Со освојувањето на првото место, машкиот ката тим (Божиновски, Марковски и Китани) обезбеди директен пласман на претстојното Светско првенство во Полска.

Истовремено, со остварените резултати, Надалина Талевска, Каја Темелковска, Илина Шобевска и Давид Стојчевски обезбедија норми за учество на Балканското првенство, кое ќе се одржи од 6 до 8 ноември 2026 година.

„Горда сум како тренер бидејќи секоја година успесите се сè поголеми. Оваа година очекувам висок пласман на Светското првенство, како и освојување медали од Балканското првенство“, истакна тренерката на клубот, Стевка Јанковска Петковска.