Голем пожар во близина на Солун, гаснат и авиони и хеликоптери, евакуирани жители

Пожарот, пишуваат грчките медиуми, сега е ограничен на пошумена област, каде што пожарникарите се фокусирани да спречат повторно разгорување на огнот во двете фабрики – едната за рециклирање и другата за текстил, кои се уништени во стихијата

Пожарот избувна синоќа во близина на периферијата на Солун, вториот по големина град во Грција, соопшти противпожарната служба, а жителите на три помали предградија мораа да бидат евакуирани. Пожарот избувнал во клисура во планинска област околу 20:30 часот синоќа и брзо се проширил во рамнината, горејќи главно грмушки, соопшти грчката противпожарна служба. Иако домовите биле спасени, пожарот уништи два индустриски погони и предизвика евакуација на три села и еден дом за нега, пренесуваат грчките медиуми. Според „Катимерини“, информациите од противпожарната служба говорат дека во текот на ноќта огнената стихија во општината Ореокастро, која е предградие на Солун, во голема мера е локализирана и повеќе нема активен фронт.

На жителите на селата Антополис, Филотеј и Галини им било кажано да се евакуираат преку СМС пораки. Евакуиран е и објект во кој се сместени 157 лица со пречки во развојот. Околу 120 од нив кои можат да одат се сместени во локалната гимназија, додека други се префрлени во психијатриска болница.

Вкупно 160 пожарникари, поддржани од 52 противпожарни возила, пет копнени екипи, два авиона и два хеликоптери, остануваат на местото на настанот во Ореокастро, предградие на градот.

Пожарот сега е ограничен на пошумена област, каде што пожарникарите се концентрираат на спречување на разгорување во две фабрики уништени од пожарот – фабрика за рециклирање и текстилна фабрика. Екипите вршат континуирани операции за гаснење за ладење на жариштата околу локациите.

Градоначалникот на Неаполи-Сикис, Симос Даниилидис, рече дека жителите слушале континуирани експлозии од индустриските простории во текот на ноќта. Тој ја повика јавноста да ги следи официјалните упатства поради токсичниот облак од чад што се прошири низ поголемиот дел од метрополитенската област на Солун.

Даниилидис рече дека индустриската зона содржи мазива, нафтени производи, постројки за преработка на текстил и фабрика за рециклирање во која се складираат големи количини пластика.