Големи поплави во Бугарија - Велико Трново најтешко погодено од поплавите

Вонредна состојба е прогласена во бугарскиот град Велико Трново, откако поројни дождови синоќа ги претворија улиците во реки, поплавија десетици домови и однесоа автомобили.

Состојбата во градот и општината останува критична откако реката Јантра се излеа од коритото, а водостојот достигна речиси седум метри, на критични 6 метри, јавија бугарските медиуми.

Огромниот бран од Габрово и Дрјаново продолжува да го зголемува нивото на реката и да ги загрозува ниските делови од градот, објави дописникот на БГНЕС од регионот.

Возачите се повикуваат да користат заобиколни патишта. Според градоначалникот Даниел Панов, над Велико Трново наврнале повеќе од 80 литри дожд на квадратен метар за само 40 минути – количина што обично паѓа цел месец.

Тој рече дека градот не видел таква катастрофа од 2014 година.