Запознајте го Муза - новиот ВИ агент на Мета

Во стилот на познатите телетабиси, Мета го претстави Муза (Muse), нов агент на Вештачка Интелигенција (ВИ), кој не се ограничува само на одговарање прашања, туку може самостојно да извршува задачи во име на корисникот. Компанијата го опишува како личен дигитален асистент кој може да планира патувања, испраќа електронска пошта, пополнува формулари, пребарува интернет и презема различни активности врз основа на зададена цел.

За разлика од класичните чет-ботови, Муза може да продолжи да работи и откако корисникот ќе ја затвори апликацијата, а потоа да побара одобрение кога треба да преземе почувствителна активност, како испраќање порака или купување. Токму оваа автономност го прави производот интересен, но истовремено отвора сериозни прашања околу безбедноста и приватноста.

Контроверзите започнаа веднаш по лансирањето на 8-ми септември 2026 г. На пример, новинарот Џејсон Атен тврди дека Муза пристапил до, и синхронизирал база со околу 187 илјади линии од неговите приватни пораки, иако тој сметал дека пристапот до пораките е исклучен. Случајот предизвика загриженост околу тоа до колку податоци навистина може да пристапи еден ваков агент.

Мета, сепак, го отфрла тврдењето дека Муза може да ги чита пораките без дозвола. Компанијата наведува дека за пристап до пораките потребни се две одделни дозволи – Целосен Пристап до Дискот (Full Disk Access) и активирање на конекторот до пораките во Муза.

Дополнителни сомнежи предизвика и случај во кој, според еден корисник, Муза испратил домашна адреса до заинтересиран купувач преку Facebook Marketplace.

Во секој случај, Муза претставува значаен чекор кон системите на ВИ, кои не само што разговараат со корисниците, туку делуваат во нивно име. Но, токму затоа контролата над дозволите, податоците и активностите на агентот ќе биде клучна за довербата во оваа технологија.